Valgarður Guðjónsson

Við Fræbbblar fórum norður um helgina og spiluðum á Græna hattinum. Við höfum verið lengi á leiðinni að spila þarna, nokkrum sinnum tekið frá kvöld, en einhvern veginn aldrei gengið upp.

En mikið rosalega var gaman að spila þarna, öll aðstaða og allar græjur til fyrirmyndar og ekki verra að vinna með fyrsta flokks hljóðmanni. Frábært hjá Hauki – og öllum á Græna hattinum – að halda þessum stað gangandi, það er nákvæmlega svona staður sem mér finnst gaman að spila… ekki of stór, en nógu stór, allt til alls, og góður „andi“ [í merkingunni auðvelt að ná fram góðri stemmingu].

En þar fyrir utan var þetta ógleymanlegt kvöld… Helgi og hljóðfæraleikararnir hófu leik, stórskemmtileg hljómsveit.. og okkur gekk, að ég held, alveg þokkalega vel. Við höfðum smá áhyggjur af Gumma, sem var sárlasinn, en hann sagði okkur að vera ekki með þetta væl fyrir hans hönd, settist við trommusettið og spilaði hátt í tvo tíma á fullu, með stuttri pásu. Spilamennskan gekk mjög vel, einhverjir minni háttar hnökrar í fáum lögum og tvö hefðu þolað að vera örlítið hraðari (og eitt örlítið hægara) en að mestu leyti mjög fín keyrsla og við skemmtum okkur að minnsta kosti mjög mjög vel, og að ég held einhverjir í salnum – svona vil ég hafa hljómleika!

Við Iðunn tókum svo bjór á Götubarnum eftir hljómleika með Díönu og Sigrúnu, en aðrir Fræbbblar fóru að sofa.. Gummi var útkeyrður, Helgi að verða veikur, Assi búinn að vera uppi á fjalli frá því snemma um morguninn.

Ég heyrði biskup segja að það væri nú þegar aðskilnaður ríkis og kirkju. Já, á Íslandi. Nú ætla ég biskup ekki að fara vísvitandi með svona fleipur.

Það er deginum ljósara að

• stofnun sem er á fjárlögum
• starfsmenn stofnunar lúta lögum um réttindi og skyldur opinberra starfsmanna

er ríkisstofnun… það þarf ekkert að ræða þetta frekar, allt annað er útúrsnúningur, misskilningur, blekkingarleikur eða þess vegna hrein og klár ósannindi.

Að ógleymdu smáatriðum sem samt skilgreina vel stöðu stofnunarinnar

• hún fær nefnilega að kaupa vín á sömu kjörum og sendiráð
• yfirmaður hennar ferðast á diplómatapassa

Nú ætla ég biskup sem sagt ekki að láta svona vitleysu frá sér fara vísvitandi. Kannski var biskup ný vöknuð af draumi (sem væntanlega hefur verið hálfgerð martröð fyrir hana).

En látum þá endilega þennan draum rætast.

Það er fullkomlega galið að í upplýstu samfélagi sé stórum fjárhæðum varið til stofnunar sem byggir á einhverju sem ekki nokkur maður hefur getað sýnt fram á að sé til – ekki hafa einu sinni verið færð rök fyrir að einhverjar (hverfandi) líkur séu á að þetta sé til.

Og rétt til að taka af allan vafa, og frábiðja mér útúrsnúninga… það er í góðu lagi mín vegna að fólk trúi hverju sem það vill, hafi sína siði og tilheyri þeim söfnuði sem það á samleið með. Auðvitað innan þeirra marka að viðkomandi starfsemi brjóti ekki réttindi annarra.

En þetta á ekkert erindi sem ríkisstofnun. Og það á ekki að auka fjárveitingar til svona stofnunar á sama tíma og blóðugur niðurskurður stendur yfir í heilbrigðiskerfinu sem sannnanlega virkar.

Ég var að spjalla við mann sem ég kannast við og hann hélt því fram fullum fetum að það væri allt í lagi að beita ofbeldi.

Jú, það væri að vísu lögbrot, og það mætti búast við refsingu ef upp kæmist.

En rökin hans voru þau að það væri ekki hægt að koma algjörlega í veg fyrir ofbeldi. Ekki nema með miklu eftirlitskerfi þar sem frelsi borgaranna væri skert og „stóri bróðir“ fylgdist með hverju fótmáli.

Ég reyndi eitthvað að malda í móinn, það væri nú samt ekki í lagi að ganga svona freklega á rétt annarra, þetta væri jú ólöglegt og það að strangt eftirlit til að koma algjörlega í veg fyrir ofbeldi þýddi ekki það sama og að ofbeldi væri löglegt.

Mig rámar í að hafa tekið sams konar umræðu vegna annars málefnis, man ekki alveg hvað það var…

Kannski er ég bara að röfla.. annað eins hefur nú gerst.

Og kannski er þetta fáránleg hugmynd.. en stundum er gott að velta upp fáránlegum hugmyndum.

Og kannski hefur þetta verið skoðað og slegið af.eftir vandlega skoðun.

En, svo það sé á hreinu þá á ég engar hagsmuna að gæta, nema kannski minn hluta í betri efnahag.

En ég get ekki gert að því að velta fyrir mér eftir umræðurnar um skatt á flutninga fjármagns kröfuhafa úr landi.. stöðugleikaskatt eins og það heitir víst á nýmáli.

Hefur sem sagt engum dottið í hug að það sé ekki endilega besta leiðin að reyna að koma í veg fyrir flutning fjármagns úr landi að beita boðum, bönnum, skattlagningu og hvers kyns lagakrókum.

Gæti mögulega hugsanlega verið betri leið að búa svo um hnútana að þeir sem eiga þetta fjármagn vilji frekar fjárfesta hér á landi en að koma peningunum eins fljótt og hægt er úr klóm okkar? Gæti jafnvel skilað meiri „hagsæld“ en fyrirhugaðar skatttekjur? Mögulega laðað enn fleiri fjárfesta?

Við Fræbbblar spiluðum á Gauknum með Gímaldin og TV Smith. Óneitanlega frekar fámennt, en aðalatriðið samt að þetta voru flottir hljómleikar.

Gímaldin hóf dagskrá kvöldins, verulega flottur gítarleikari og sérstakt efni.

Okkur gekk svo sem mjög vel, Gummi trommari reyndar lasinn, en lét engan bilbug á sér finna.. Helgi mætti og spilaði á bassa – þrátt fyrir að hafa gert ráð fyrir að taka frí. Held að þetta hafi verið með okkar betri kvöldum, reyndar er ég ekki frá því að við séum kannski loksins komin á annað .. það gerist orðið varla lengur að við eigum slæman dag. Gummi trommari á stóran þátt í því, hann einfaldlega klikkar ekki, „rock solid“ ef svo má segja.. og eins munar miklu að hafa Rikka á gítar, ég get leyft mér að sleppa því að spila þegar mér sýnist.

TV Smith lauk svo dagskránni.. ekki ósvipað og í gær, mikill kraftur, mjög gott efni og úthaldið ótrúlegt. Við buðum honum að kíkja með okkur á Forréttabarinn milli „sándtékks“ og hljómleika.. en hann vildi frekar slaka á og fá sér eitthvað lítið snarl á gistiheimilinu. Ég spurði hvort hann þyrfti ekki að borða til að halda út svona langa dagskrá, en nei, hann sagðist bara verða slappur ef hann borðaði mikið..

Forréttabarinn já, ekki má gleyma að við fórum þangað, þeas. við Iðunn, Viktor, Gummi, Assi, Stína og Gavin. Gavin er vinur Júlla og kom gagngert til landsins til að mæta í afmælið hans, hefur komið tvisvar áður, með hljómsveitinni Validators / Activators.