hhmmmm

Posted: júlí 10, 2026 in Íþróttir, Fótbolti, Umræða

Ég hef lengi haft talsverða skömm á alþjóðasamtökum ákveðinnar íþróttagreinar, gat ekki sleppt því að fylgjast með stórmóti 2018 – íslenska landsliðið keppti þar – fylgdist takmarkað með 2022 – en nú var mér algjörlega nóg boðið. Ruglið sem samtökin hafa boðið upp á er að eyðileggja íþrótt sem ég hef haft gaman af að fylgjast með frá 1970, jafnvel lítillega 1966.

Ég ákvað að fylgjast ekkert með, hef einfaldlega ekki nokkurn áhuga. Ekki svo að skilja að ég lokaði augunum og héldi fyrir eyrun ef einhver var að horfa eða stemmingin væri þannig að allir sem ég var með vildu horfa.. en aldrei að sækjast eftir því að fylgjast með, fann mér eitthvað annað að gera ef svo bar undir, enda áhugamálin mörg og fjölbreytt.

Og það litla sem ég hef dottið inn á að horfa hefur svo sem ekki orðið til að ég sjái eftir neinu. Leikirnir af“spyrnu“leiðinlegir og lélegir, svona eins og leikmenn hálf partinn skammist sín fyrir að taka þátt og séu því fegnastir að liðið þeirra detti út. Eina undantekningin skilst mér (nennti ekki að horfa) hafi verið þegar Belgar niðurlægðu eina af gestgjafaþjónunum eftir ævintýralegt rugl samtakanna.

Gott og vel, hef ekki efni á að alhæfa, enda ekki horft mikið. En, annars ágætir þulir, nefndu eftir einn hörmulegan lélegan og leiðinlegan leik að sá hefði verið einn sá besti / skemmtilegasti í mótinu.

Þannig að ég held að ég hafi ekki misst af miklu.

Lýðskrum í Reykjavík?

Posted: maí 13, 2026 in Samfélag, Stjórnmál
Efnisorð:,

Það vakti athygli mína þegar forsvarsmaður eins flokksins sem býður fram í Reykjavík afgreiddi mörg önnur framboð á einu bretti sem „lýðskrum“ – þar með talið Pírata sem hafa nú kannski átt hvað heiðarlegustu og málefnalegustu borgafulltrúa síðustu ára.

Vissulega á hugtakið „lýðskrum“ við um mörg framboðin – framboð sem stíla inn á mannfyrirlitningu, fordóma og takmarkanir á sjálfsögðum mannréttindum – framboð sem höfða til fólks með litla þekkingu og fólks sem kannski vill, „ranglega“, kenna öðrum um eigin stöðu, fnykur af málflutningi ómerkinga vestanhafs.

En „lýðskrum“ getur líka tekið á sig aðrar myndir.

Er það ekki „lýðskrum“ að bjóða fram fólk sem hefur lítið fram að færa annað en að hafa verið vingjarnlegt andlit í fjölmiðlum sem valkost til að stýra borginni? Sporin ættu kannski að fæla..

Og er það ekki „lýðskrum“ að koma fram og þykjast ætla að bæta rekstur borgarinnar en vera svo varla læs á reikninga borgarinnar? Og hafa jafnvel sögu af því að hafa gefið eignir borgarinnar?

Og er það ekki „lýðskrum“ að gagnrýna borgarlínu – sem jafnvel fulltrúar sama flokks í öðrum sveitarfélögum hafa stutt – án þess að hafa nokkuð fram að færa annað en að halda að það sé hægt að spóla til baka til 1960?

Og er það ekki „lýðskrum“ að staglast á eins ómerkilegu málefni og bílastæði eru nú reyndar, sérstaklega vegna þess að staða þeirra hefur sennilega aldrei verið betri?

Það er ekkert leyndarmál að ég hef stutt Pírata síðustu árin og kem til með að greiða þeim atkvæði mitt um helgina.

Viðræðuhöfnunarhópurinn

Posted: mars 10, 2026 in Samfélag, Stjórnmál, Umræða
Efnisorð:,

Er alltaf öðru hverju að sjá athugasemdir við atkvæðagreiðslu um ESB viðræður, ekki athugasemdir við aðild, heldur það að yfirleitt ræða málið.

Nú er ég yfirhöfuð bara ekki á því að það sé neitt að því að ræða málið og skoða frekar.

En þeir sem virðast vera að pissa á sig af hræðslu við það eitt að málið sé rætt virðast falla í nokkra sérstaka flokka, gjarnan fleiri en einn:

  • eru stuðningsmenn Talibana stjórnarinnar vestanhafs
  • hafa ítrekað talað gegn mannréttindum
  • hafa sérstaklega beitt sér gegn réttindum LGTB+
  • tala eins og þeim sé umhugað um efnahag Íslands en geyma stórar upphæðir í skattaskjólum
  • telja að við getum sko gert miklu betur en þetta Evrópusamband, hafa samt setið sjálf(ir) við stjórnvölinn að einhverju eða öllu leyti síðustu áratugi án þess að ráða við verkefnið
  • eiga nokkuð langa sögu af fráleitum rangfærslum
  • virðast í afneitum gagnvart vísindum hvort sem það snýr að loftslagsmálum eða bólusetningum
  • eru oftar en ekki ginnkeyptir fyrir að hvaða glórulausri samsæriskenningu sem finnst undir (og yfir) sólinni
  • gjarnan rökþrota og svara með aulabröndurum og útúrsnúningum þegar ekki er annað upp á tengingnum
  • virðast ekki geta lesað sér til gagns um einfaldar bókanir

Nú er kannski ekki rétt að afgreiða málflutning út frá hver ber hann á borð… en þetta er eiginlega ekki einleikið.

Áhyggjur

Posted: janúar 29, 2026 in Samfélag
Efnisorð:, ,

Þetta eru vonandi óþarfa áhyggjur.. en með fáfróðan, illa gefinn, óupplýstan – og nú bætast við elliglöp / heilabilun – einstakling með mikil völd þá hef ég áhyggjur. Raunverulega mjög miklar áhyggjur.

Það hjálpar ekki að viðkomandi er með mikilmennskubrjálæði á háu stigi, hégómagirnd sem sprengir alla skala, rað-fýlupúki út af öllu og engu – og í rauninni illa innrætt kvikyndi sem ber enga virðingu fyrir mannslífum, hvað þá mannréttinum – að ónefndum lögum og reglum.

Það sem helst virðist kveikja á glórulausum aðgerðum er óttinn við að upplýsingar um barnaníð og/eða landráð komist í hámæli.. þannig að við vitum aldrei hvenær næsta klikkun kemur.

Ég er ekki að grínast – alls ekki – því kannski er vissara að flytja sig aðeins til á meðan hann ruglar ítrekað saman Íslandi og Grænlandi og hótar innrás í Grænland.

Að drulla yfir fórnarlömb

Posted: janúar 20, 2026 in Umræða

Eins sorglegt og tilgangslaust morðið vestanhafs var þá er eiginlega enn sorglegra að sjá aumkunarverða tilburði til réttlætingar í kjölfarið.

Allt er tínt til að ata fórnarlambið auri, líkast til er megnið af því hreinn uppspuni, amk. eru engar tilvísanir í gögn, eingöngu fullyrðingar út og suður.

Það er verið að tína til atriði sem morðinginn hefði aldrei getað vitað og breyta því engu um sekt hans.

Og auðvitað – þó svo að eitthvað af þessu væri rétt þá réttlætir það aldrei, aldrei morð, hvað þá að halda áfram að skjóta, að ég tali nú ekki um að neita fórnarlambinu um læknisaðstoð.

Það er sorglegt að fylgjast með.

Þetta nær jafnvel hingað – ég get ekki mögulega skilið hvað veldur því að íslenskir stuðningsmenn dæmds glæpamanns, nauðgara og líklega barnaníðings í annarri heimsálfu – sem þykist vilja gera það ríki máttugra en það var – eru að missa sig í að drulla yfir fórnarlamb morðs?

Vill þetta lið fá svona umhverfi hér heima? Fólk myrt af handahófi og morðið réttlætt vegna þess að stuðningsmennirnar halda með “sínu liði” hvað sem á gengur. Jafnvel þó liðið sé í annarri heimsálfu og hafi sem aðal markmið að auka mátt síns ríkis á kostnað annarra, þar með talið okkar.

Athyglisdreifingin

Posted: janúar 12, 2026 in Spjall, Stjórnmál, Umræða

Ég efast um að innrásin til að taka yfir stjórn Venesúela hafi verið til að beina athyglinni frá skjölum sem sannreyna mikla og nána vináttu forsetans vestanhafs við helsta skipuleggjanda mansals síðustu áratuga – að ógleymdum nokkuð öruggri vissu um barnaníð. Það hefur einfaldlega komið í ljós að stuðningsmönnum forsetans er slétt sama um barnaníð, þetta var einfaldlega þeirra „verkfæri“ í baráttunni til að vinna síðustu forsetakosningar, þar sem öll meðöl voru leyfileg. Sumir hafa þóst kaupa fráleitar, hlægilegar og mótsagnakenndar skýringar. Aðrir hafa beinlínis viðurkennt að þeim sé slétt sama þó gaurinn hafi misnotað börn.. hann sé jú að sinna mikilvægri baráttu fyrir kristilegum gildum.

Ég held að þetta hafi snúist um að það kom fram daginn áður að kynntar voru upplýsingar um að það væri hafið yfir allan vafa að gaurinn hafi staðið á bak við valdaránstilraun fyrir fimm árum. Og kannski enn verra fyrir meðlimi sértrúarsafnaðarins.. hann hafi oftar en einu sinni viðurkennt að hafa skíttapað kosningunum 2020.

Þannig að ég ætlaði að leggja til að Grænlendingar og Danir og Íslendingar gætu dregið andann rólega í einhverja mánuði, að minnsta kosti þar til fáfróða, getulausa, spillta, viðriðnið ætlaði sér að reyna að aflýsa kosningunum næsta haust – og klára endanlega að breyta ríkinu sem stærir sig af forystu í lýðræði í einræðisríki.

En svo kom þetta skelfilega morð vanhæfu klikkhausanna í sérsveitum forsetans og blákaldar og óskammfeilnar lygar hans um atburðarásina.

Þannig að mig grunar að ekki sé langt í næstu innrás í fullvalda ríki frá sjálfskipuðum „friðarsinna“.

Hefði einhver reynt að skrifa bók fyrir nokkrum áratugum sem lýsti svona atburðarás hefði hún verið hlegin út af borðinu. Sérstakt að þurfa að upplifa þetta…

Barði Valdimarsson

Posted: janúar 9, 2026 in Minningar
Efnisorð:

Barði Valdimarsson lést síðasta sunnudag í Kaupmannahöfn.

Við áttum langa, en kannski eitthvað slitrótta, samleið gegnum lífið, vissum hvor af öðrum í barna- og gagnfræðaskóla – en kynntumst ekki almennilega fyrr en í menntaskóla MK.

Tíminn þar einkenndist kannski af mörgum áhugamálum og það var einhvern veginn alltaf yfirdrifið nóg að gera.. spiluðum bridds, fótbolta, kom fyrir að við fengum okkur í glas (jafnvel heimatilbúið), talsvert mikið á ferðinni á rúntinum gamla, duttum inn í Sigtún og Óðal og jafnvel Hollywood, kannski Klúbbinn. Og við fórum í bíó – vorum gjarnan búnir að sjá allar myndir sem voru í boði í fjölmörgum bíóhúsum borgarinnar – og Fjalakettinum.

Við sóttum svo sameiginlega um stöðu framkvæmdastjóra Fjalakattarins, fengum starfið og sinntum því veturinn 1978-1979. Þeirri lotu lauk svo með eftirminnilegri ferð til London vorið 1979.

Ósætti Barða við yfirvöld skólans urðu til að við stofnuðum Fræbbblana, ásamt fleiri vinum. Hann hætti svo nánast strax enda ekki mikinn áhuga á tónlistinni, amk. ekki á þessum tíma.

Við héldum lengi vel góðu sambandi, hann og Anna Sigga voru meðal okkar bestu vina þegar börnin voru ung – hef ekki tölu á kvöldunum sem við kíktum til þeirra (jafnvel með Alexöndru í burðarrúmi) að spila bridds.

Eftir að Barði flutti út í lok síðustu aldar slitnaði sambandið en við fórum að hittast aftur upp úr áramótum. Þá var Tina komin til sögunnar – og seinna Duna. Ég man að eitt af fyrstu skiptunum sem við hittumst á þessari öld sagði Iðunn eftir gott matarboð, “ég var búinn að gleyma hvað hann Barði er skemmtilegur”

Við reyndum að hittast reglulega, þó það væri ekki oft, en héldum ágætu sambandi í gegnum samfélagsmiðla og síma.

Síðustu árin var Barði orðinn mjög veikur, hvert áfallið af öðru kom en hann hristi þau jafn harðan af sér, þurfti auðvitað að standa undir viðurnefninu sem hann gaf sjálfum sér, “Barði harði”. Ég ætla ekki að rekja sjúkdómssöguna, það eru mörg ár síðan hann átti að eiga lítið eftir, en alltaf komst hann aftur á ról. Á endanum varð annað Covid tilfellið það sem hann réði ekki við. Þegar við heyrðumst síðast, núna í desember, virtist hann bjartsýnn á að ná þokkalegri heilsu og við vorum að tala um að finna tíma til að hittast.

Innilegar samúðarkveðjur frá okkur til fjölskyldunnar.

Fréttirnar á morgnana

Posted: janúar 8, 2026 in Samfélag
Efnisorð:, ,

Af gömlum vana byrja ég flesta morgna á að kíkja á fréttir.. og skal játa að ég er alltaf jafn undrandi á að ekki sé búið að skjót’ann. Eða hann hafi amk. hrokkið upp af af sjálfsdáðum.

Ekki misskilja. Alls ekki misskilja. Ég er alls ekki, engan veginn og aldrei að vonast eftir þessu.

Fyrir það fyrsta þá finnst mér ekki til fyrirmyndar að óska einhverjum dauðdaga, jafnvel verstu illmenni mannkynssögunnar eiga fjölskyldu og sumar hverjir jafnvel einhverja eiga vini.. Og ekki mæli ég ofbeldi bót í pólitískum tilgangi, það er sjaldnast rétta leiðin.

En aðallega þá finnst mér skipta verulegu máli að hann og hans hyski fái makleg málagjöld og dúsi sem lengst á bak við lás og slá. Þjóðir læra mest af því að taka á svona illþýði og úrhrökum sem tuddast til valda af festu og með lögum þar sem virkt og sanngjarnt réttarkerfi klárar málin.

Og svo óttast ég verulega að ef hann endar sem “fórnarlamb” þá verði allt eins líklegt að eftir tvö þúsund ár eða svo verði öflugur trúarsöfnuður, klofinn í mörg hundruð deildir, jafnvel ríkisrekinn sem tilbiðji þetta viðundur. Það er jú nægilega stór hópur sem trúir öllu í blindni sem frá honum kemur og afneitar allri gagnrýni, öllum óþægilegum staðreyndum og sér ekki í gegnum einföldustu og augljósustu lygar. Táknið yrði væntanlega riffill eða hríðskotabyssa.. nú eða derhúfa.

Og ekkert HM í fótbolta á næsta ári

Posted: desember 5, 2025 in Fótbolti
Efnisorð:,

Upp á síðkastið hef ég verið að (reyna að) minnka fótbolta áhorf og tíma sem ég tek í að fylgjast með fréttum og umræðu. Það gengur kannski ekkert sérstaklega vel en mjakast.

Ekki hafði ég hugsað mér að fylgja mikið með HM karla í fótbolta á næsta ári, sérstaklega ekki leikjum sem spilaðir verða í Ríkjasambandi Ameríku – og eftir að íslenska liðið missti af þátttöku varð þetta nú enn minna spursmál.

Ég lét mig hafa það að horfa á HM 2022 í Katar með “óbragð í augum og eyrum”. Mér fannst vesaldómur stjórnenda FIFA ekki mega eyðileggja þessa hátíð, einhverjar leifar voru enn af þeirri hugmynd – sem var staglast á þegar ég var yngri – að fótboltinn væri utan við pólitík. Og að þarna hefðu verið gerð gróf mistök sem erfitt hefði verið að bakka út úr – og yrðu í það minnsta ekki endurtekin. Ég var að reyna sýna lit og forðast að styrkja helstu stuðningsaðila mótsins, en komst fljótt að því að ég keypti aldrei neitt frá þeim hvort sem var!

Í öllu falli, FIFA beit heldur betur höfuðið af skömminni og ég hef ekki geð í mér að horfa á þetta.

Leiðir skilja við Pírata

Posted: nóvember 29, 2025 in Samfélag, Stjórnmál
Efnisorð:,

Þá á ég ekki lengur samleið með Pírötum..

Þetta hefur reyndar verið sérstakt samband, hreyfingin varð til í einfeldningslegri og beinlínis hættulegri baráttu gegn höfundarrétti – ég reifst talsvert við marga liðsmenn á sínum tíma.

En þrátt fyrir nafnið þá fjaraði þetta út – eftir stóð barátta fyrir heiðarlegum stjórnmálum, gagnsæi, mannréttindum og nýrri stjórnarskrá. Allt hlutir sem mér fundust mjög mikilvægir. Ekki spillti hversu öflugir einstaklingar voru í starfi og framboði fyrir Pírata (best að nefna engin nöfn, ég myndi gleyma einhverjum sem ætti skilið að ég nefndi).

En í dag var Alexöndru Briem hafnað í formannskjöri. Ekki ætla ég að láta eins og það skipti ekki máli að Alexandra er dóttir mín en það er ekki aðalatriðið.

Það sem ég get ekki sætt  mig við er að Alexandra hefur verið ótrúlega dugleg að vinna að stefnu flokksins, óþreytandi að starfa innan félagsins, sívinnandi fyrir kosningar að styðja frambjóðendur – hvort sem hún var sjálf í framboði eða ekki.

Og Alexandra hefur unnið mjög vel í borgarstjórn Reykjavíkur síðustu kjörtímabil, ekki auðvelt starf og auðvitað ekki hægt að gera svo öllum líki – en ég held að ég geti fullyrt að hún hafi verið vel liðin af samherjum, andstæðingum og samstarfsfólki.

Píratar eru í vandræðum, eftir slaka kosningu fyrir ári síðan.

Ég held að dagar Pírata séu taldir ef þetta er hugarfarið, vanþakklæti og vantraust eru fyrstu orðin sem koma upp í hugann.

Mögulega væru Píratar ekki í vandræðum ef þeir sem töldu rétt að taka þátt í að kjósa formann hefðu verið virkir í starfi flokksins.

Older Entries