Að kljúfa þjóð

Posted: ágúst 23, 2026 in Umræða
Efnisorð:,

Ég hef nákvæmlega ekki nokkrar áhyggjur af því að þjóðin klofni – hvorki lítillega, hvað þá í herðar niður – við það eitt að ræða kosti og galla aðildar að ESB þegar samningur liggur fyrir. Ég geri frekar fyrir að samþykkja, ekki hvað sem er, en hef nokkuð góða trúa á að við náum ásættanlegum samningi. En ég er fullkomlega sáttur við að þjóðin hafni ef meirihluti tekur afstöðu gegn því eftir málefnalegar umræður.

Það sem gæti klofið þjóðina – varla samt í „herðar niður“ – er ef örfáar hræður djöflast linnulaust í þjóðinni með hömlulausum áróðri, rangfærslum, ýkjum, útúrsnúningum og hreinum lygum. Og að stór hluti þjóðarinnar kokgleypi áróðurinn gagnrýnis- og hugsunarlaus.

Brexit var erfitt fyrir Breta, kannski ekki síst vegna þess að fámennur hópur keyrði þetta í gegn með sams konar aðferðafræði og NEIjarar gera hér á Íslandi fyrir – ekki einu sinni aðild – heldur það eitt að fá að sjá hvers konar aðild verður í boði.

Ég hef engar forsendur til að fullyrða að þessi fámenni hópur sé að mestu fólk sem þykist eiga landið og miðin og þykist mega gera hvað sem þeim sýnist. Í öllu falli þá er einn fjölmiðill mjög samstíga í gegndarlausum áróðrinum og ég man ekki til að sá fjölmiðill hafi gert mikið til að skaprauna eigendum sínum.

Og á hinn bóginn dettur mér enginn önnur skýring í hug.

Og það væri skelfilegt er stór hluti þjóðarinnar lætur tuddast í sér til að taka ákvörðun út frá fölskum forsendum.

Fræbbblarnir, vita betur!

Posted: ágúst 8, 2026 in Tónlist
Efnisorð:, , , ,

Þá er loksins komið að útgáfu á nýrri Fræbbblaplötu, „… vita betur!“.

Við höldum upp á útgáfuna á Dillon, laugardaginn 8. ágúst, seinni partinn, kannski 16:30 eða svo – ekki útgáfuhljómleikar, þeir koma í haust, en öll lögin verða spiluð hátt og skýrt, amk. tvisvar.

Þessi plata hefur verið nokkuð lengi í vinnslu, fyrstu upptökur voru hjá Sveini Kjartanssyni í Sýrlandi 2019, næst hjá Birgi Jóni Birgissyni í Sundlauginni 2021 og svo aftur hjá Svenna í Sýrlandi 2024. Við höfum svo verið að taka upp söng og auka gítara hjá Rikka. Svenni hljóðblandaði lögin og sá um frágang, „masteringu“.

Lögin „Nóg (er meira en nóg)!“ – þar sem Pétur Pétursson og Þorsteinn Hallgrímsson sungu bakraddir með okkur – og „Stormur í blíðunni“ – þar sem Andrea Gylfa syngur með okkur – komu út sérstaklega en fengu ekki, að mér fannst, verðskuldaða athygli.

Að hluta til voru lögin að slípast til á hljómleikum og við vildum taka upp aftur en ætli aðal flöskuhálsinn hafi ekki verið sá að ég gat ekki skrifað texta. Þetta hafðist á endanum – góð törn í Budapest og önnur hjá Kela og co. á Langaholti – og ég er svona að mestu þokkalega sáttur – þó mig langi endalaust að snyrta til og betrumbæta.

Við höfðum aðeins á bak við eyrað að vera ekki að endurtaka okkur of mikið, helst ekki líkt neinu sem við höfðum gert áður – en samt þannig að það færi ekkert á milli mála hvaða hljómsveit væri á ferðinni. Það má svo deila um hvernig til tókst, en ég er nokkuð sannfærður um að okkur hafi tekist vel til, en auðvitað skiptir mín skoðun litlu!

Enda geri ég mér enga grein fyrir því hvernig hún virkar og alveg eins líklegt að gamlir „aðdáendur“ verði fyrir vonbrigðum – nú eða ekki!

Það kom upp í spjalli um 10cc að sú hljómsveit hafi verið einhvers konar „prog-pop“.. kannski flokkast þetta sem „prog-punk“ – veit ekki og ekki mitt að skilgreina.

Platan er í boði á öllum streymisveitum (sem við vitum af) og kemur á vinyl í haust, jafnvel geisladiskum, en varla kassettum.

Ég var spurður hvort nafnið væri ekki full yfirlætislegt.. jú, það má vera, nema við séum að gera aðeins grín að okkur sjálfum. Ekki veit ég – eða jú, ég veit, en ætla ekki að segja.

hhmmmm

Posted: júlí 10, 2026 in Íþróttir, Fótbolti, Umræða

Ég hef lengi haft talsverða skömm á alþjóðasamtökum ákveðinnar íþróttagreinar, gat ekki sleppt því að fylgjast með stórmóti 2018 – íslenska landsliðið keppti þar – fylgdist takmarkað með 2022 – en nú var mér algjörlega nóg boðið. Ruglið sem samtökin hafa boðið upp á er að eyðileggja íþrótt sem ég hef haft gaman af að fylgjast með frá 1970, jafnvel lítillega 1966.

Ég ákvað að fylgjast ekkert með, hef einfaldlega ekki nokkurn áhuga. Ekki svo að skilja að ég lokaði augunum og héldi fyrir eyrun ef einhver var að horfa eða stemmingin væri þannig að allir sem ég var með vildu horfa.. en aldrei að sækjast eftir því að fylgjast með, fann mér eitthvað annað að gera ef svo bar undir, enda áhugamálin mörg og fjölbreytt.

Og það litla sem ég hef dottið inn á að horfa hefur svo sem ekki orðið til að ég sjái eftir neinu. Leikirnir af“spyrnu“leiðinlegir og lélegir, svona eins og leikmenn hálf partinn skammist sín fyrir að taka þátt og séu því fegnastir að liðið þeirra detti út. Eina undantekningin skilst mér (nennti ekki að horfa) hafi verið þegar Belgar niðurlægðu eina af gestgjafaþjónunum eftir ævintýralegt rugl samtakanna.

Gott og vel, hef ekki efni á að alhæfa, enda ekki horft mikið. En, annars ágætir þulir, nefndu eftir einn hörmulegan lélegan og leiðinlegan leik að sá hefði verið einn sá besti / skemmtilegasti í mótinu.

Þannig að ég held að ég hafi ekki misst af miklu.

Megas

Posted: júlí 10, 2026 in Minningar, Tónlist

Þá er Megas látinn, innilegar samúðarkveðjur til fjölskyldu og vina.

Við þekktumst svo sem ekki mikið, spiluðum reglulega saman á Menningarnótt í portinu á bak við veitingastaðinn Við Tjörnina, sem stóð fyrir hljómleikunum. Megas sem hluti af MegaSukk og ég með Fræbbblunum. Ég man eftir nokkrum góðum stundum eftir hljómleikana, forvitnilegt spjall (reyndar ekki alltaf gott að skilja) – en hann var af þeirri kynslóð að þurfa að fara í hljóðfæraverslanir og kaupa nótur af nýjum lögum, td. Elvis Presley, til að fylgjast með.. það var svona happa og glappa á þeim tíma hvort og hvenær plötur bárust til landsins og hvað var spilað í útvarpi.

Ég kynntist tónlistinn hans fyrst þegar Kiddi, bróðir minn, keypti litla plötu, með lögunum „Spáðu í mig“ og „Komdu og skoðaðu kistuna mína“. Þarna var einhver ferskur vindur – kraftur, húmor – og kannski það sem skipti mestu, hann gerði það sem honum sýndist og var ekkert að eltast við staðla um hvernig popp/rokk stjörnur ættu að vera.

Ætli það hafi ekki opnað fyrir mér dyr sem skipti meira máli en tónlistin og textarnir. Enda veit ég vel að þegar kemur að lögunum hans þá eru miklu heitari aðdáendur, fólk sem hefur fylgst með hverju spori og kann lögin. Og ég var ekkert alltaf heillaður af sömu lögum og aðrir, en það er bara mín sérviska og mínar takmarkanir.

Lýðskrum í Reykjavík?

Posted: maí 13, 2026 in Samfélag, Stjórnmál
Efnisorð:,

Það vakti athygli mína þegar forsvarsmaður eins flokksins sem býður fram í Reykjavík afgreiddi mörg önnur framboð á einu bretti sem „lýðskrum“ – þar með talið Pírata sem hafa nú kannski átt hvað heiðarlegustu og málefnalegustu borgafulltrúa síðustu ára.

Vissulega á hugtakið „lýðskrum“ við um mörg framboðin – framboð sem stíla inn á mannfyrirlitningu, fordóma og takmarkanir á sjálfsögðum mannréttindum – framboð sem höfða til fólks með litla þekkingu og fólks sem kannski vill, „ranglega“, kenna öðrum um eigin stöðu, fnykur af málflutningi ómerkinga vestanhafs.

En „lýðskrum“ getur líka tekið á sig aðrar myndir.

Er það ekki „lýðskrum“ að bjóða fram fólk sem hefur lítið fram að færa annað en að hafa verið vingjarnlegt andlit í fjölmiðlum sem valkost til að stýra borginni? Sporin ættu kannski að fæla..

Og er það ekki „lýðskrum“ að koma fram og þykjast ætla að bæta rekstur borgarinnar en vera svo varla læs á reikninga borgarinnar? Og hafa jafnvel sögu af því að hafa gefið eignir borgarinnar?

Og er það ekki „lýðskrum“ að gagnrýna borgarlínu – sem jafnvel fulltrúar sama flokks í öðrum sveitarfélögum hafa stutt – án þess að hafa nokkuð fram að færa annað en að halda að það sé hægt að spóla til baka til 1960?

Og er það ekki „lýðskrum“ að staglast á eins ómerkilegu málefni og bílastæði eru nú reyndar, sérstaklega vegna þess að staða þeirra hefur sennilega aldrei verið betri?

Það er ekkert leyndarmál að ég hef stutt Pírata síðustu árin og kem til með að greiða þeim atkvæði mitt um helgina.

Björgvin Halldórsson

Posted: apríl 28, 2026 in Minningar, Tónlist

Innilegar samúðarkveðjur til fjölskyldu og vina Björgvins Halldórssonar.

Við þekktumst svo sem ekki mikið, kynntist honum lítilega fyrst við kvikmyndagerð þegar ég var að vinna við Óðal feðranna – en þá sjaldan að við hittumst fór alltaf vel á með okkur – hlýr og jákvæður.

Og þó svo við værum nú kannski á sitt hvorri hillunni þegar kom að tónlist – bæði stefnum og fagmennsku, sem var nú kannski ekki mín deild 🙂 – þá fundum við nú nokkra sertifleti, síðast í hléi hjá Elvis Costello og Nick Lowe í Hörpunni, sagðist nú aðallega hafa komið til að hlusta Nick, sem ég hélt að ekki margir hér heima vissu hver væri.

Viðræðuhöfnunarhópurinn

Posted: mars 10, 2026 in Samfélag, Stjórnmál, Umræða
Efnisorð:,

Er alltaf öðru hverju að sjá athugasemdir við atkvæðagreiðslu um ESB viðræður, ekki athugasemdir við aðild, heldur það að yfirleitt ræða málið.

Nú er ég yfirhöfuð bara ekki á því að það sé neitt að því að ræða málið og skoða frekar.

En þeir sem virðast vera að pissa á sig af hræðslu við það eitt að málið sé rætt virðast falla í nokkra sérstaka flokka, gjarnan fleiri en einn:

  • eru stuðningsmenn Talibana stjórnarinnar vestanhafs
  • hafa ítrekað talað gegn mannréttindum
  • hafa sérstaklega beitt sér gegn réttindum LGTB+
  • tala eins og þeim sé umhugað um efnahag Íslands en geyma stórar upphæðir í skattaskjólum
  • telja að við getum sko gert miklu betur en þetta Evrópusamband, hafa samt setið sjálf(ir) við stjórnvölinn að einhverju eða öllu leyti síðustu áratugi án þess að ráða við verkefnið
  • eiga nokkuð langa sögu af fráleitum rangfærslum
  • virðast í afneitum gagnvart vísindum hvort sem það snýr að loftslagsmálum eða bólusetningum
  • eru oftar en ekki ginnkeyptir fyrir að hvaða glórulausri samsæriskenningu sem finnst undir (og yfir) sólinni
  • gjarnan rökþrota og svara með aulabröndurum og útúrsnúningum þegar ekki er annað upp á tengingnum
  • virðast ekki geta lesað sér til gagns um einfaldar bókanir

Nú er kannski ekki rétt að afgreiða málflutning út frá hver ber hann á borð… en þetta er eiginlega ekki einleikið.

Áhyggjur

Posted: janúar 29, 2026 in Samfélag
Efnisorð:, ,

Þetta eru vonandi óþarfa áhyggjur.. en með fáfróðan, illa gefinn, óupplýstan – og nú bætast við elliglöp / heilabilun – einstakling með mikil völd þá hef ég áhyggjur. Raunverulega mjög miklar áhyggjur.

Það hjálpar ekki að viðkomandi er með mikilmennskubrjálæði á háu stigi, hégómagirnd sem sprengir alla skala, rað-fýlupúki út af öllu og engu – og í rauninni illa innrætt kvikyndi sem ber enga virðingu fyrir mannslífum, hvað þá mannréttinum – að ónefndum lögum og reglum.

Það sem helst virðist kveikja á glórulausum aðgerðum er óttinn við að upplýsingar um barnaníð og/eða landráð komist í hámæli.. þannig að við vitum aldrei hvenær næsta klikkun kemur.

Ég er ekki að grínast – alls ekki – því kannski er vissara að flytja sig aðeins til á meðan hann ruglar ítrekað saman Íslandi og Grænlandi og hótar innrás í Grænland.

Að drulla yfir fórnarlömb

Posted: janúar 20, 2026 in Umræða

Eins sorglegt og tilgangslaust morðið vestanhafs var þá er eiginlega enn sorglegra að sjá aumkunarverða tilburði til réttlætingar í kjölfarið.

Allt er tínt til að ata fórnarlambið auri, líkast til er megnið af því hreinn uppspuni, amk. eru engar tilvísanir í gögn, eingöngu fullyrðingar út og suður.

Það er verið að tína til atriði sem morðinginn hefði aldrei getað vitað og breyta því engu um sekt hans.

Og auðvitað – þó svo að eitthvað af þessu væri rétt þá réttlætir það aldrei, aldrei morð, hvað þá að halda áfram að skjóta, að ég tali nú ekki um að neita fórnarlambinu um læknisaðstoð.

Það er sorglegt að fylgjast með.

Þetta nær jafnvel hingað – ég get ekki mögulega skilið hvað veldur því að íslenskir stuðningsmenn dæmds glæpamanns, nauðgara og líklega barnaníðings í annarri heimsálfu – sem þykist vilja gera það ríki máttugra en það var – eru að missa sig í að drulla yfir fórnarlamb morðs?

Vill þetta lið fá svona umhverfi hér heima? Fólk myrt af handahófi og morðið réttlætt vegna þess að stuðningsmennirnar halda með “sínu liði” hvað sem á gengur. Jafnvel þó liðið sé í annarri heimsálfu og hafi sem aðal markmið að auka mátt síns ríkis á kostnað annarra, þar með talið okkar.

Athyglisdreifingin

Posted: janúar 12, 2026 in Spjall, Stjórnmál, Umræða

Ég efast um að innrásin til að taka yfir stjórn Venesúela hafi verið til að beina athyglinni frá skjölum sem sannreyna mikla og nána vináttu forsetans vestanhafs við helsta skipuleggjanda mansals síðustu áratuga – að ógleymdum nokkuð öruggri vissu um barnaníð. Það hefur einfaldlega komið í ljós að stuðningsmönnum forsetans er slétt sama um barnaníð, þetta var einfaldlega þeirra „verkfæri“ í baráttunni til að vinna síðustu forsetakosningar, þar sem öll meðöl voru leyfileg. Sumir hafa þóst kaupa fráleitar, hlægilegar og mótsagnakenndar skýringar. Aðrir hafa beinlínis viðurkennt að þeim sé slétt sama þó gaurinn hafi misnotað börn.. hann sé jú að sinna mikilvægri baráttu fyrir kristilegum gildum.

Ég held að þetta hafi snúist um að það kom fram daginn áður að kynntar voru upplýsingar um að það væri hafið yfir allan vafa að gaurinn hafi staðið á bak við valdaránstilraun fyrir fimm árum. Og kannski enn verra fyrir meðlimi sértrúarsafnaðarins.. hann hafi oftar en einu sinni viðurkennt að hafa skíttapað kosningunum 2020.

Þannig að ég ætlaði að leggja til að Grænlendingar og Danir og Íslendingar gætu dregið andann rólega í einhverja mánuði, að minnsta kosti þar til fáfróða, getulausa, spillta, viðriðnið ætlaði sér að reyna að aflýsa kosningunum næsta haust – og klára endanlega að breyta ríkinu sem stærir sig af forystu í lýðræði í einræðisríki.

En svo kom þetta skelfilega morð vanhæfu klikkhausanna í sérsveitum forsetans og blákaldar og óskammfeilnar lygar hans um atburðarásina.

Þannig að mig grunar að ekki sé langt í næstu innrás í fullvalda ríki frá sjálfskipuðum „friðarsinna“.

Hefði einhver reynt að skrifa bók fyrir nokkrum áratugum sem lýsti svona atburðarás hefði hún verið hlegin út af borðinu. Sérstakt að þurfa að upplifa þetta…

Older Entries