Archive for the ‘Stjórnmál’ Category

Menntað lýðræði

Posted: september 6, 2026 in Samfélag, Stjórnmál, Umræða
Efnisorð:,

Í tilefni nýlegrar þjóðaratkvæðagreiðslu þá vil ég ítreka hugmyndir mínar um „menntað lýðræði“.

Í stuttu máli þurfa kjósendur að svara einföldum spurningum um óumdeildar staðreyndir, einfaldlega til að takmarka niðurstöðurnar við atkvæði þeirra sem hafa sýnt þá lágmarkskurteisi að kynna sér um hvað er verið að greiða atkvæði. Atkvæði þeirra sem hafa ekki kynnt sér málið verða einfaldlega ekki talin með.

Um síðustu helgi hefði mátt spyrja, „Er verið að kjósa um aðild að Evrópusambandinu?“ eða „Verða íslensk ungmenni látin gegna herþjónustu ef við höldum viðræðum áfram?“

Hvort tveggja er afdráttarlaust og óumdeilt út frá þekktum staðreyndum – svarið er sannanlega nei.

Atkvæði þeirra sem svara annarri hvorri spurningunni játandi hefðu einfaldlega ekki verið talin með, hafa augljóslega ekki svo mikið sem óljósan grun um hvað er verið að kjósa um.

Ég veit alveg af ýktum og langsóttum tilbúnum dæmum um hvernig mætti misnota svona kerfi. En það er ekkert sérstaklega flókið að vinna sig fram hjá þeim hættum sem eru til staðar.

Til dæmis mætti hugsa að kallaður yrði til hópur, 7, 13 eða 25 manns, hugsanlega rektorar háskólanna, forseti hæstaréttar og fleiri sem ekki er líklegt að eigi sérstakra hagsmuna að gæta. Þessi hópur þyrfti að samþykkja spurningarnar einróma. En hvað ef í öll þessi embætti safnast fólk með annarleg sjónarmið og á þingi verður meirihluti fyrir stórhættulegum ákvörðunum? Já, ekkert sérstaklega líklegt og hvort sem er, ef við erum komin þangað þá er ólíklegt efnt verði til þjóðaratkvæðagreiðslu yfirhöfuð.. og þessar skoðanir líkast til hvort sem er með mikinn meirihluta hjá þjóðinni.

Síðasti varnaglinn felst í því að kynna spurningarnar fyrirfram og hvert rétt og óumdeilanlegt svar er. Það verður auðvitað einfaldara að „svindla“ á þessu, en ég ímynda mér að það vefjist fyrir einhverjum að svara þvert á eigin forsendur – og ef viðkomandi hefur fyrir því að kynna sér þetta, þá er í góðu lagið að telja atkvæðið með. Og það er líka erfiðara fyrir „óprúttna“ aðila að hringja til dæmis í unga kjósendur og segja „heyrðu, þú verður að segja nei í þjóðaratkvæðagreiðslunni annars verður þú kallaður / kölluð í Evrópuherinn, en þú þarft samt að svara spurningunni þannig að þú vitir að þetta er útilokað“.

Ég er sannfærður um að við myndum taka betri ákvarðanir ef við notum þessa aðferð.

Ég geri mér grein fyrir það hringja viðvörunarbjöllur – sem er gott, svona hugmyndum á að taka með fyrirvara og gagnrýni.

Samt.. áfram

Posted: ágúst 30, 2026 in Stjórnmál, Umræða
Efnisorð:,

Ég neita því ekki að ég er mjög svekktur með niðurstöður gærdagsins.

Auðvitað sætti ég mig við að þetta sé niðurstaðan.

Í þetta skipti get ég samt ekki borið virðingu fyrir niðurstöðunni, einfaldlega vegna alls þess fjölda sem greindi frá atkvæði sínu með því að styðjast við rangfærslur – auðvitað ekki allir, en ótrúlega stór hluti ef marka má handahófskennt úrtak.

Ég held reyndar að þessar kosningar hafi verið mistök, vel meint, en samt mistök – það þarf ekki að benda á annað en að fjöldi fólks hélt að það væri að kjósa um eitthvað allt annað en kosningin snerist um.

En þetta er langtíma verkefni.

Til skamms tíma þarf að leggja af ríkisstyrki til fjölmiðla sem standast ekki lágmarks kröfur.

Þá þarf að skattleggja fyrirtækin sem telja sig eiga landið og miðin og mokuðu peningum í grímulausan áróður með rangfærslum, rökleysum, útúrsnúningum, afbökunum og hreinum lygum.

En til lengri tíma litið er þetta spurning um menntun.

Það þarf leggja áherslu á að kenna að lesa sér til gagns og vinna úr upplýsingum. Þessu er klárlega mjög ábótavant.

Og það þarf líka að kenna muninn á rökræðum og rifrildi og persónulegum árásum. Það kom oftar en einu sinni og oftar en tvisvar fyrir að einhver gerði grein fyrir atkvæði sínu og lét fylgja rök sem héldu ekki vatni. Ég man ekki til að í eitt einasta skipti hafi viðkomandi þakkað fyrir leiðréttingar, skoðað gögnin betur og jafnvel skipt um skoðun. Undantekningarlaust voru viðbrögðin eitthvað á þessa leið „ég má hafa mína skoðun, vertu ekki ráðast á mig“.

Kannski eigum við ekkert erindi á meðal siðaðra þjóða fyrr en þetta er komið í betra lag?

Lýðskrum í Reykjavík?

Posted: maí 13, 2026 in Samfélag, Stjórnmál
Efnisorð:,

Það vakti athygli mína þegar forsvarsmaður eins flokksins sem býður fram í Reykjavík afgreiddi mörg önnur framboð á einu bretti sem „lýðskrum“ – þar með talið Pírata sem hafa nú kannski átt hvað heiðarlegustu og málefnalegustu borgafulltrúa síðustu ára.

Vissulega á hugtakið „lýðskrum“ við um mörg framboðin – framboð sem stíla inn á mannfyrirlitningu, fordóma og takmarkanir á sjálfsögðum mannréttindum – framboð sem höfða til fólks með litla þekkingu og fólks sem kannski vill, „ranglega“, kenna öðrum um eigin stöðu, fnykur af málflutningi ómerkinga vestanhafs.

En „lýðskrum“ getur líka tekið á sig aðrar myndir.

Er það ekki „lýðskrum“ að bjóða fram fólk sem hefur lítið fram að færa annað en að hafa verið vingjarnlegt andlit í fjölmiðlum sem valkost til að stýra borginni? Sporin ættu kannski að fæla..

Og er það ekki „lýðskrum“ að koma fram og þykjast ætla að bæta rekstur borgarinnar en vera svo varla læs á reikninga borgarinnar? Og hafa jafnvel sögu af því að hafa gefið eignir borgarinnar?

Og er það ekki „lýðskrum“ að gagnrýna borgarlínu – sem jafnvel fulltrúar sama flokks í öðrum sveitarfélögum hafa stutt – án þess að hafa nokkuð fram að færa annað en að halda að það sé hægt að spóla til baka til 1960?

Og er það ekki „lýðskrum“ að staglast á eins ómerkilegu málefni og bílastæði eru nú reyndar, sérstaklega vegna þess að staða þeirra hefur sennilega aldrei verið betri?

Það er ekkert leyndarmál að ég hef stutt Pírata síðustu árin og kem til með að greiða þeim atkvæði mitt um helgina.

Viðræðuhöfnunarhópurinn

Posted: mars 10, 2026 in Samfélag, Stjórnmál, Umræða
Efnisorð:,

Er alltaf öðru hverju að sjá athugasemdir við atkvæðagreiðslu um ESB viðræður, ekki athugasemdir við aðild, heldur það að yfirleitt ræða málið.

Nú er ég yfirhöfuð bara ekki á því að það sé neitt að því að ræða málið og skoða frekar.

En þeir sem virðast vera að pissa á sig af hræðslu við það eitt að málið sé rætt virðast falla í nokkra sérstaka flokka, gjarnan fleiri en einn:

  • eru stuðningsmenn Talibana stjórnarinnar vestanhafs
  • hafa ítrekað talað gegn mannréttindum
  • hafa sérstaklega beitt sér gegn réttindum LGTB+
  • tala eins og þeim sé umhugað um efnahag Íslands en geyma stórar upphæðir í skattaskjólum
  • telja að við getum sko gert miklu betur en þetta Evrópusamband, hafa samt setið sjálf(ir) við stjórnvölinn að einhverju eða öllu leyti síðustu áratugi án þess að ráða við verkefnið
  • eiga nokkuð langa sögu af fráleitum rangfærslum
  • virðast í afneitum gagnvart vísindum hvort sem það snýr að loftslagsmálum eða bólusetningum
  • eru oftar en ekki ginnkeyptir fyrir að hvaða glórulausri samsæriskenningu sem finnst undir (og yfir) sólinni
  • gjarnan rökþrota og svara með aulabröndurum og útúrsnúningum þegar ekki er annað upp á tengingnum
  • virðast ekki geta lesað sér til gagns um einfaldar bókanir

Nú er kannski ekki rétt að afgreiða málflutning út frá hver ber hann á borð… en þetta er eiginlega ekki einleikið.

Athyglisdreifingin

Posted: janúar 12, 2026 in Spjall, Stjórnmál, Umræða

Ég efast um að innrásin til að taka yfir stjórn Venesúela hafi verið til að beina athyglinni frá skjölum sem sannreyna mikla og nána vináttu forsetans vestanhafs við helsta skipuleggjanda mansals síðustu áratuga – að ógleymdum nokkuð öruggri vissu um barnaníð. Það hefur einfaldlega komið í ljós að stuðningsmönnum forsetans er slétt sama um barnaníð, þetta var einfaldlega þeirra „verkfæri“ í baráttunni til að vinna síðustu forsetakosningar, þar sem öll meðöl voru leyfileg. Sumir hafa þóst kaupa fráleitar, hlægilegar og mótsagnakenndar skýringar. Aðrir hafa beinlínis viðurkennt að þeim sé slétt sama þó gaurinn hafi misnotað börn.. hann sé jú að sinna mikilvægri baráttu fyrir kristilegum gildum.

Ég held að þetta hafi snúist um að það kom fram daginn áður að kynntar voru upplýsingar um að það væri hafið yfir allan vafa að gaurinn hafi staðið á bak við valdaránstilraun fyrir fimm árum. Og kannski enn verra fyrir meðlimi sértrúarsafnaðarins.. hann hafi oftar en einu sinni viðurkennt að hafa skíttapað kosningunum 2020.

Þannig að ég ætlaði að leggja til að Grænlendingar og Danir og Íslendingar gætu dregið andann rólega í einhverja mánuði, að minnsta kosti þar til fáfróða, getulausa, spillta, viðriðnið ætlaði sér að reyna að aflýsa kosningunum næsta haust – og klára endanlega að breyta ríkinu sem stærir sig af forystu í lýðræði í einræðisríki.

En svo kom þetta skelfilega morð vanhæfu klikkhausanna í sérsveitum forsetans og blákaldar og óskammfeilnar lygar hans um atburðarásina.

Þannig að mig grunar að ekki sé langt í næstu innrás í fullvalda ríki frá sjálfskipuðum „friðarsinna“.

Hefði einhver reynt að skrifa bók fyrir nokkrum áratugum sem lýsti svona atburðarás hefði hún verið hlegin út af borðinu. Sérstakt að þurfa að upplifa þetta…

Leiðir skilja við Pírata

Posted: nóvember 29, 2025 in Samfélag, Stjórnmál
Efnisorð:,

Þá á ég ekki lengur samleið með Pírötum..

Þetta hefur reyndar verið sérstakt samband, hreyfingin varð til í einfeldningslegri og beinlínis hættulegri baráttu gegn höfundarrétti – ég reifst talsvert við marga liðsmenn á sínum tíma.

En þrátt fyrir nafnið þá fjaraði þetta út – eftir stóð barátta fyrir heiðarlegum stjórnmálum, gagnsæi, mannréttindum og nýrri stjórnarskrá. Allt hlutir sem mér fundust mjög mikilvægir. Ekki spillti hversu öflugir einstaklingar voru í starfi og framboði fyrir Pírata (best að nefna engin nöfn, ég myndi gleyma einhverjum sem ætti skilið að ég nefndi).

En í dag var Alexöndru Briem hafnað í formannskjöri. Ekki ætla ég að láta eins og það skipti ekki máli að Alexandra er dóttir mín en það er ekki aðalatriðið.

Það sem ég get ekki sætt  mig við er að Alexandra hefur verið ótrúlega dugleg að vinna að stefnu flokksins, óþreytandi að starfa innan félagsins, sívinnandi fyrir kosningar að styðja frambjóðendur – hvort sem hún var sjálf í framboði eða ekki.

Og Alexandra hefur unnið mjög vel í borgarstjórn Reykjavíkur síðustu kjörtímabil, ekki auðvelt starf og auðvitað ekki hægt að gera svo öllum líki – en ég held að ég geti fullyrt að hún hafi verið vel liðin af samherjum, andstæðingum og samstarfsfólki.

Píratar eru í vandræðum, eftir slaka kosningu fyrir ári síðan.

Ég held að dagar Pírata séu taldir ef þetta er hugarfarið, vanþakklæti og vantraust eru fyrstu orðin sem koma upp í hugann.

Mögulega væru Píratar ekki í vandræðum ef þeir sem töldu rétt að taka þátt í að kjósa formann hefðu verið virkir í starfi flokksins.

Rökleysan með síðasta hálmstráið til að verja trúðinn í vestri

Posted: júní 2, 2025 in Stjórnmál, Umræða

Ég á (átti) nokkra vini / félaga / kunningja sem studdu trúðinn sem situr á forsetastól í ónefndu ríkjasambandi.

Það hefur talsvert kvarnast úr stuðningnum..

  • hann átti að hafa svo mikið vit á viðskiptum, en skilur ekki hvernig tollar virka og virðist halda að framleiðendur í öðrum löndum borgi þá.. eitthvað fækkaði nú í aðdáendahópnum þegar þetta kom í ljós.
  • hann átti að vera svo snjall að reka fyrirtæki að það væri fín hugmynd að fá hann til að reka ríkissjóð, en svo rifjaðist upp löng saga gjaldþrota, hafði einhver, en merkilega lítil áhrif.
  • hann átti að vera svo harður samningamaður, en flumbrugangur, stöðugur sveiflur og endalausar eftirgjafir þar sem allt var gefið eftir slógu það út af borðinu.
  • þá voru þau sem voru sátt við að hann hefði komið sér undan því að gegna herþjónustu með því að láta pabba kaupa sér frí, sem ég gæti svo sem skilið, en svo vill hann hersýningu á afmælinu!
  • hann átti að vera óvenjulegur stjórnmálamaður og koma með ferska vinda í umhverfi sem var á kafi í mútuþægni.. vindarnir hafa vissulega verið ferskir en í þá átt að mútur hafa komið eins og loftlagsbreytinga stormsveipur í stjórnmálin vestanhafs og aldrei verið meiri og augljósari.
  • hann ætlaði svo sannarlega að sjá til að verð á nauðsynjavörum lækkaði, það hefur ekki beinlínis gengið eftir, þvert á móti, staglaðist á þessu í kosningabaráttunni, en fer í smábarnafýlu ef einhver rifjar þetta upp – hefur svo sem ekki breytt miklu fyrir stuðningsfólk hér á landi, en ekki þurft að kaupa “köttinn” í sekknum.
  • margir voru ánægðir með þær fyrirætlanir að ráðast ekki inn í önnur lönd, en hótanir um innrásir á Grænland og Panama hafa nú gert það að engu, sennilega sneru nú flestir bak við honum eftir þetta.
  • þá voru einhverjir sem töldu hann talsmann hefðbundinna fjölskyldugilda, þrátt fyrir óhefðbundna fjölskyldusögu.. en það féll svo endanlega þegar kom í ljós að hann hafði keypt sér kynlífsþjónustu, en þetta var jú vitað fyrir og virtist ekki breyta miklu.
  • öðrum fannst mikið til koma hvernig til stóð að taka á ólöglegum innflytjendum, það fór svo þegar kom í ljós að honum fannst allt í lagi að senda löglega innflytjendur úr landi.
  • einhverjir voru að sjá fyrir sér lög og reglu, en svo var hann dæmdur glæpamaður.
  • ég veit ekki hvers vegna fólki hér á landi hrífst af því að vilja gera lönd eins og Argentínu, Perú, Ekvador stórkostleg (kannski halda viðkomandi að það sé bara eitt ríki í Ameríku, það væri í takt við aðra fáfræði hópsins).

En síðasta hálmstráið sem stuðnigsmenn hans hér hafa hangið á eins og úrillur hvolpur á roði að hann sé nú samt betri vegna þess að forsvarsmenn hins stóra stjórnmálaflokksins séu á kafi í einhverjum vændishring (gott ef ekki barna). Þær kenningar standast ekki nokkra skoðun, eru eiginlega með vitlausari og glórulausustu samsæriskenningum sem haldið er á lofti.

Til að kóróna vitleysuna þá eru sams konar tengingar eru á milli forsetans og ætluðum skipuleggjanda vændishringins, meira að segja mun skýrari, hann og aðalskipuleggjandi hringsins virðast hafa verið góðir kumpánar og ítrekað verið að saman í teitum.. og forsetinn óskaði hægri hönd skipuleggjandans alls hins besta þegar upp komst um hlut hennar.

Ég ætla alls ekki að fullyrða að forsetinn tengist mansali, hvað þá tengdu börnum – til þess þarf talsvert meiri upplýsingar og gögn – en hann er mun líklegri en allir aðrir stjórnmálamenn vestanhafs.

Á endanum er þetta er svokölluð hring rökleysa.. fyrst gefur fólk sér að hópur B sé sekur um eitthvað, í framhaldinu gefur þetta sami hópur sér að þá hljóti hópur A að vera saklaus (sem er auðvitað hrein rökleysa) og svo þegar búið er að gefa sér (fyrirfram) að hópur A sé saklaus þá eru allar vísbendingar um “sekt” hans afgreiddar sem hluti af einhverju samsæri og ofsóknum – jafnvel þó öll gögn og vísbendingar séu mun sterkari.

Stjórn

Posted: desember 22, 2024 in Stjórnmál
Efnisorð:

Ég er nokkuð jákvæður gagnvart nýrri ríkisstjórn. Það virðist hafa tekist nokkuð vel til við ráðherraval, sérstaklega er ég ánægður að sjá Loga Einars í mennta- og menningarmálum, en almennt virðist nú hafa verið leiðarljós að velja fólk sem þekkti vel til hvers málaflokks. Sennilega hefði Kristrún sem fjármálaráðherra og Þorgerður Katrín sem forsætisráðherra verið betri samsetning.

Þá er ég mjög sáttur við þá stefnu að leyfa þjóðinni að svara því hvort við viljum ganga í Evrópusambandið. Ég hefði auðvitað viljað sjá afdráttarlaust að samþykkt stjórnarskrá tæki gildi en annað virðist nú vera á nokkuð góðu róli.

Ég var ekki sérstakur stuðningsmaður síðustu ríkisstjórnar en auðvitað var hún ekki alslæm og þurfti að eiga við nokkuð mörg erfið verkefni. Og nokkrir ráðherrar stóðu sig mjög vel í erfiðum málum. En það var of mikið um klúður, of mikið um klaufagang og einhvers konar við-ráðum-við-megum yfirlæti.

Ég kaus Pírata og sakna þeirra af þingi, hefði vel getað hugsað mér að kjósa Viðreisn og Samfylkingin kannski komið til greina. Flokkur fólksins var ekki inni í myndinni há mér, þrátt fyrir stórt hjarta og mikinn velvilja – einfaldlega of mikil fáfræði og vanþekking í bland við innantómar fullyrðingar og útlendingafordóma. Reyndar breyttist margt á síðustu metrunum, fordómarnir viku(svona að mestu) og eitthvert innihald var í málflutningi.. þar held ég að mestu skipti að flokkurinn var nokkuð heppinn með frambjóðendur.

Kosninganiðurstöðuvangaveltur

Posted: desember 1, 2024 in Stjórnmál
Efnisorð:,

Rétt að taka saman vangaveltur eftir kosningarnar.

Það virðist hafa tekist að jafna fjölda þingsæta út frá fjölda atkvæða.

Það hefði ekki þurft nema 9 atkvæði til að breyta hvaða einstaklingar fengu þingsæti.

Þetta hefði gerst ef D hefði tapað 9 atkvæðum í Reykjavík suður eða eitthvert annað framboð bætt við sig 9 atkvæðum. Sama hefði gerst ef D hefði bætt við sig 9 atkvæðum í Suðvestur.

Þetta hefði haft þau áhrif að

  • Reykjavík norður: C, 3 Grímur Grímsson dettur út og D, 3, Brynjar Níelsson kemur inn
  • Reykjavík suður: D, 3, Jón Pétur Zimsen dettur út  og RS, C, 3, Aðalsteinn Leifsson kemur inn

Eflaust má finna samsetningar með fleiri en einni breytingu, en þetta er minnsta staka breytingin sem ég finn.

22.064 atkvæði fóru til flokka sem ekki fengu þingsæti, alls 45.274 nýttust ekki.

Ef 5% reglan hefði ekki verið þá hefðu úrslitin verið (hafi ég sett rétt inn)

  • B 5
  • C 10
  • D 12
  • F 9
  • J 2
  • M 8
  • P 2
  • S 14
  • V 1

Allt birt með þeim fyrirvara að ég er nývaknaður eftir langa kosninganótt, en einhver smá skekkja breytir ekki heildarmyndinni. 5% reglan er alveg glórulaus, sett á sínum tímai af stjórnmálamönnum í þeim tilgangi að fækka flokkum á þingi og auðvelda þannig þingmönnum stjórnarmyndun. Sem sagt.. auðvelda þingmönnum sem nenna ekki að vinna – réttur kjósenda til að fá fulltrúa á þing skiptir engu.

Fullveldi og ákvarðanir

Posted: nóvember 28, 2024 in Samfélag, Stjórnmál
Efnisorð:, ,

Það er verið að staglast á því í kosningaáróðrinum að við afsölum okkur fullveldi með því að ganga í ESB.

Þetta stenst enga skoðun, þjóð sem ekki er fullvalda hefði til að mynda ekki getað ákveðið að ganga úr sambandinu.

Þetta er svona grundvallar misskilningur og/eða ómerkilegur útúrsnúningur á hugtakinu “fullveldi”.

Ekki síst í ljósi þess að við erum þegar skuldbundin miklu af því sem ákveðið er hjá ESB í gegnum EES samninginn.

Og svo fylgir gjarnan að gengið er út frá að allar ákvarðanir Evrópusambandsins séu sjálfkrafa skelfilega vondar.

Ég er þvert á móti viss um að megnið af ákvörðunum sem teknar eru í Brussel (og víðar) séu að öllu jöfnu talsvert miklu betri en ákvarðanir sem mishæfir valdamenn hér heima hafa tekið.

Older Entries