Valgarður Guðjónsson

Ég verð svo í þessum vangaveltum um hvað ég get hugsað mér að kjósa og hvað ekki – að nefna nokkuð mikilvæg atriði, traust og trúverðugleika. Ég set eftirfarandi atriði ekki sem úrslitaatriði, en þau vega þungt.

• Það gengur til dæmis ekki að flokkur tali um að minnka rekstur ríksisins en vilji á sama tíma halda ríkisreknu trúfélagi.
• Það er ekki í boði að fá atkvæði frá mér þó frambjóðendur tali fjálglega um málfrelsi og frelsi eintaklingsins en lyfti svo ekki litla fingri þegar freklega er brotið á einföldum mannréttindum. Hér standa þeir verr að vígi sem eiga fulltrúa á þingi, það hefur til dæmis enginn lagt fram frumvarp um að breyta lögum um meiðyrði, hvað þá að bæta þeim skaðann sem beittir hafa verið misrétti.
• Það gengur heldur ekki að tala um frjálsa samkeppni og afhenda svo völdum aðilum verðmæti, hvort sem það eru bankar eða veiðiheimildir.
• Og það er mikilvægt að gera upp við hrunið. Ekki það að ég vilji „hengja“ alla sem annað hvort sváfu á verðinum eða gerðu mistök. En það skiptir máli að viðurkenna mistök, að hafa lært eitthvað og geta sagt hvað yrði gert öðru vísi.
• Og svo má ekki gleyma að það er ekki í lagi að starfa við löggjöf og segjast hafa „haft hliðsjón“ af lögum við ákvarðanir í stað þess að fylgja þeim.
• Svo gef ég lítið fyrir upphrópanir og loforð um töfralausnir í efnahagsmálum, nema viðkomandi geti sýnt hvernig viðkomandi lausn á að virka, málefnalega og með örkum og hafi svarað mótrökum.
• Þá fer verulega stór mínus á vogina hjá flokki sem skartar frambjóðendum sem boða hvers kyns kukl og hjávísindi.

Ég setti inn færslu fyrir nokkrum dögum þar sem ég velti fyrir mér hvað ég ætli að kjósa í næstu kosningum. Kannski er þetta ótímabært þegar ekki er ljóst hvaða valkostir verða í framboði…

Fyrir utan það sem ég nefndi fyrst, þeas. að vinnubrögðin skipta miklu máli, þá eru nokkur mál sem eru frágangssök. Ég veit að ég finn ekkert draumaframboð og engan lista eða flokk sem ég verð sammála í einu og öllu. Og auðvitað er ég tilbúinn til að skoða öll mál og skipta um skoðun ef nýjar upplýsingar koma fram eða ef ég heyri góð rök.

En, að því óbreyttu, gef ég ekki afslátt af eftirfarandi atriðum (röðin skiptir ekki máli):

• Fullan aðskilnað ríkis og kirkju, ég segi fullan til að losna við hártoganir og útúrsnúninga um núverandi fyrirkomulag.
• Nýja stjórnarskrá á þessu ári, helst þá sem nú liggur fyrir, en það má auðvitað rökræða minni háttar breytingar. Framboð sem heldur því fram að núverandi stjórnarskrá sé bara nógu góð eða bíða megi með breytingar fær ekki atkvæði frá mér.
• Afnám núverandi kvótakerfis, það má finna málamiðlun og gefa aðlögunartíma, en óbreytt kerfi með „eignarhaldi“ einstaklinga eða fyrirtækja á sameiginlegum auðlindum kemur ekki til greina.
• Mannréttindi og málfrelsi verði færð til þess horfs sem þau eru í Evrópu og í fullri alvöru verði tekið á því að koma í veg fyrir frekari rassskellingar Mannréttindadómsstóls Evrópu.
• Já og allt tal um afnám verðtryggingar er tóm tjara, amk. eitt og sér.

Ég er strax farinn að hafa áhyggjur af því hvað ég á að kjósa í vor. Jæja, ekki kannski áhyggjur, en farinn að velta vöngum yfir mögulegum kostum.

Ég hef kosið ýmsa flokka gegnum tíðina en oftar en ekki hef ég hreinlega ekki náð á kjörstað, þrátt fyrir góðan vilja – hef setið við prófanir og æfingar fyrir útsendingar sjónvarps og útvarps.

Kannski nýir flokkar standi, ósanngjarnt, betur að vígi en þeir sem hafa átt fulltrúa á þingi, það er einfaldlega styttri eða engin saga til að gagnrýna.

En ég geri ákveðnar kröfur um nálgun og vinnubrögð. Það að geta rætt málefnalega, tekið rökum, skipt um skoðun, ef svo ber undir, er lykilatriði.

Þá er afstaða í nokkrum málefnum sem hreinlega útiloka að ég kjósi lista, hversu vel sem mér kann að líka önnur stefnumál – og hversu vel sem ég treysti þeim einstaklingum sem eru í framboði.

Og svo geri ég kröfur um heiðarleika og trúverðugleika – og þar með talið að standa ekki í upphrópunum og innihaldslausum yfirlýsingum sem eingöngu eru hugsaðar til að auka vinsældir.

Að lokum er rétt að nefna að ég gef lítið fyrir stórar yfirlýsingar ef ekkert er að hafst.

Fyrst að vinnubrögðum.

Ég ætla ekki að kjósa flokk eða framboð sem nálgast þingstörfin sem baráttu milli flokka, gerir kröfu um „flokksaga“, beitir málþófi, er alltaf á móti „hinum“ og alltaf með „sínum“. Að geta ekki tekið rökum og geta ekki skipt um skoðun ef nýjar upplýsingar eða sterk mótrök koma fram er ekki boðlegt.

Nánar um hina þættina fljótlega.